Американскиот претседател Доналд Трамп ги осуди обновените украински напади врз руската енергетска инфраструктура, оценувајќи дека тие не придонесуваат за напредок во мировните напори и негативно влијаат врз глобалниот пазар на енергенси.
Во интервју за телевизијата „Њузмакс“, Трамп изјави дека нападите врз рафинериите се „срамни“ и додаде дека постојат „многу други можни цели“.
„Мислам дека е потешко да се преговара со Зеленски отколку со Путин. Сè што прави е да ги зголемува светските цени на нафтата. Кога напаѓате рафинерии за дизел, не му правите никаква услуга на светот“, изјави Трамп.
Неговите коментари следуваат откако украинскиот претседател Володимир Зеленски во интервју за „Фајненшел тајмс“ изјави дека повеќе не важи забраната за напади врз руските рафинерии.
Пред пет дена, Трамп тврдеше дека Москва и Киев постигнале договор за прекин на нападите врз енергетската инфраструктура, но такво примирје досега не беше официјално потврдено ниту од руската, ниту од украинската страна.
Трамп упати и нови критики кон украинскиот претседател, оценувајќи дека преговорите со него се потешки отколку со рускиот претседател Владимир Путин.
„Зеленски не е вистинската личност со која би можеле да постигнеме договор. Вели дека сака договор, но всушност не сака. Не ми е особено симпатичен“, порача Трамп.
