Третиот тенисер во светот, Карлос Алкараз, ќе настапи на АТП турнирот во Виена, кој ќе се одржи од 26 октомври до 1 ноември. За шпанскиот тенисер ова ќе биде враќање во австриската престолнина по петгодишна пауза.
Алкараз одлуката за настап ја донел во последен момент, откако беше одложен ревијалниот турнир во Саудиска Арабија, планиран за периодот од 21 до 24 октомври.
„Сè се случи многу брзо. Карлос ја прифати поканата да дојде во Виена без двоумење откако беше одложен турнирот во Саудиска Арабија. Воодушевен сум што ќе настапи, бидејќи е еден од најинтензивните играчи и личности на целиот АТП Тур со голем број навивачи“, изјави директорот на турнирот Хервиг Страка.
Со пристигнувањето на Алкараз, турнирот во Виена доби уште посилна конкуренција. Покрај Шпанецот, настап ќе имаат и петмина тенисери од најдобрите 10 на АТП листата – Александар Зверев, Данил Медведев, Флавио Коболи, Алекс де Минаур и Франсис Тиафо.
Турнирот во Виена ќе биде една од последните проверки на формата за најдобрите тенисери пред завршниот Мастерс турнир сезонава, кој ќе се одржи во Париз од 2 до 8 ноември.
