Украинскиот ракометар Дмитро Хорига и официјално ќе може да го носи дресот на македонската репрезентација. Левиот бек (29) ја доби дозволата од Светската ракометна федерација (ИХФ) за настап за Македонија, непосредно пред почетокот на квалификациите за Европското првенство 2028.
Хорига е првиот натурализиран ракометар кој ќе заигра за македонската селекција откако Кире Лазаров ја презеде функцијата селектор.
Од Ракометната федерација на Македонија потврдија дека сите административни процедури се завршени, а очекувањата се дека искусниот бек ќе донесе дополнителен квалитет во националниот тим.
„Мислам дека добиваме ракометар кој ќе даде тежина и голем придонес. Тој е во зенитот на својата кариера и се надеваме дека со него ќе добиеме на квалитет и ќе придонесе за подобри резултати“, изјави претседателот на РФМ, Александар Стефанов.
Хорига македонски пасош доби пред две години, во периодот кога беше дел од Вардар. Во моментов настапува за унгарскиот гигант ПИК Сегед, еден од најквалитетните клубови во Европа.
Селекторот Кире Лазаров посочи дека станува збор за ракометар со квалитети кои можат да бидат значајни за репрезентацијата.
„Се работи за играч кој има шут од надвор, играч во два правци, кој има победнички карактер“, изјави Лазаров.
Со доаѓањето на Хорига, Македонија добива уште една опција на левата бековска позиција и засилување пред новиот квалификациски циклус.
