Седницата на Советот на Општина Тетово денеска беше прекината по остар судир меѓу советниците од власта и опозицијата околу две точки од дневниот ред поврзани со проекти планирани преку јавно-приватно партнерство.
Опозициските советници побараа од дневниот ред да бидат повлечени седмата и осмата точка, тврдејќи дека со предложените проекти се доведува во прашање јавниот имот и интересите на граѓаните.
Од опозицијата нагласија дека не се против развојот и инвестициите во Тетово, но се спротивставуваат на начинот на кој се предлага нивната реализација. Тие најавија дека ќе ја блокираат седницата сè додека спорните точки не бидат отстранети.
„Не сме против инвестициите во Тетово, но сме против начинот на кој се прават овие работи. Денес ќе останеме тука и ќе ја блокираме седницата“, изјави советникот Берат Мурати.
Советниците од опозицијата посочија дека еден од проектите, кој се однесува на изградба на објект за противпожарната служба, според нив, е дел од серија одлуки на актуелното општинско раководство за кои сметаат дека се штетни за градот.
„Станува збор за приватизација и сериозни прашања околу студијата за изводливост. Не може ваков документ да биде основа за одлуки со толку големо значење“, рече советникот Агрон Арифи.
Градоначалникот на Општина Тетово, Биљал Касами, оцени дека точките треба да останат на дневниот ред и дека за нив треба да се разговара преку аргументирана дебата.
Касами порача дека општината е отворена за предлози и алтернативни решенија, додавајќи дека доколку се понуди подобра стручна анализа, таа ќе биде разгледана.
„Немаме ништо да криеме. Дебатата може да трае еден ден, една недела или еден месец, но важно е да имаме квалитетни решенија за Општина Тетово“, изјави Касами.
По повеќечасовна расправа, седницата продолжи до разгледување на седмата точка, по што беше прекината и најавено е продолжение во следните денови.
И власта и опозицијата се согласија дека за предложените проекти е потребна дополнителна дебата и повеќе информации пред да се донесе конечна одлука.
