Бугарската претседателка Илијана Јотова изјави дека дури утрово дознала оти Ива Михајлова се наоѓа во Бугарија, додавајќи дека засега нема информации под кои околности обвинетата во Македонија ја напуштила земјата.
„Разбрав дека таа веќе е во Бугарија откако излегов од телевизиско студио на БТВ. Претпоставувам дека сега ќе биде прегледана во ‘Пирогов’. Ќе почекаме да видиме каков ќе биде заклучокот на бугарските специјалисти. За жал, во овој момент не можам да дадам повеќе информации“, изјави Јотова.
Одговарајќи на прашањето дали знае како Михајлова успеала да ја напушти Македонија, особено по информациите од македонското МВР дека во системот за гранична контрола нема евидентиран нејзин излез од државата, бугарската претседателка посочи дека случајот сè уште има многу непознати детали.
„Ќе видиме. Сè уште има многу нејасни околности. Мислам дека надлежните органи во Бугарија прво треба да дадат изјава“, рече Јотова.
Таа додаде дека е подготвена лично да се сретне со Михајлова откако нејзината здравствена состојба ќе дозволи, оценувајќи дека нејзиното пристигнување во Бугарија не претставува безбедносен ризик.
Ива Михајлова од Кочани е обвинета за предизвикување сообраќајна несреќа со смртни последици, а против неа се води судска постапка пред надлежниот суд во Кочани. Во рамки на постапката, според претходни информации, ѝ биле одземени личните документи како мерка на претпазливост.
Случајот предизвика дополнителни реакции откако бугарски претставници објавија дека Михајлова пристигнала во Бугарија на лекување, додека македонските институции соопштија дека немаат официјална евиденција за нејзино излегување од државата.
Од МВР дополнително информираа дека извршените проверки во системот за гранична контрола покажале дека за лицето нема регистриран излез од територијата на Македонија.
