Системот „Безбеден град“ од денеска започнува со работа и на подрачјето на СВР Охрид, што значи дека камерите ќе регистрираат сообраќајни прекршоци во Охрид, Струга, Кичево и Дебар.
Само неколку недели претходно системот беше активиран и на подрачјето на СВР Велес, каде што за период од 12 септември до 5 октомври биле евидентирани 1.518 сообраќајни прекршоци.
Од СВР Велес информираат дека во просек биле регистрирани по околу 63 прекршоци дневно, во градовите Велес, Кавадарци, Неготино и Демир Капија, како и на дел од автопатската делница од Велес до Демир Капија.
Најчеста причина за санкции било непочитувањето на ограничувањето на брзината. Од вкупниот број прекршоци, дури 1.214 се однесувале на пребрзо возење. Следуваат 290 случаи на минување на црвено светло, како и 14 прекршоци поврзани со управување возило со истечена важност на сообраќајната дозвола.
Министерот за внатрешни работи Панче Тошковски при пуштањето во употреба на системот во Повардарието порача дека целта на „Безбеден град“ не е зголемување на приходите во буџетот, туку зголемување на безбедноста и намалување на бројот на сообраќајни несреќи.
Со проширувањето на системот, надлежните очекуваат поголема контрола врз сообраќајот и доследно почитување на правилата од страна на возачите.
