Четворица возачи се санкционирани откако со своите возила непрописно го блокирале сообраќајот на булеварот „Јане Сандански“ во Скопје, информира Министерството за внатрешни работи.
Постапката е преземена по објавено видео на социјалните мрежи и во дел од медиумите, на кое се гледа како неколку возила го попречуваат нормалното одвивање на сообраќајот.
Во Одделението за безбедност на патниот сообраќај при СВР Скопје биле повикани Д.Г. (28), кој управувал „Ауди“, М.П. (25), возач на „БМВ“, Љ.Б. (48), кој управувал „Ауди“, како и С.С. (23), кој бил зад воланот на „Сузуки“. Сите возила биле со скопски регистарски таблички.
Од МВР соопштија дека против четворицата се преземени соодветни мерки согласно Законот за безбедност на сообраќајот на патиштата.
Возачите ќе се соочат со законски предвидените глоби за сторениот сообраќаен прекршок.
