Папата Лав XIV соопшти дека во наредните денови ќе биде подложен на хируршка интервенција на белите дробови, откако лекарите при неодамнешен преглед откриле мало јазолче во рана фаза.
Веста ја објави по традиционалната неделна молитва, посочувајќи дека операцијата е препорачана од медицинскиот тим по направените испитувања.
Портпаролот на Ватикан, Матео Бруни, изјави дека интервенцијата е закажана за првите денови од следната недела, а се очекува закрепнувањето да трае околу една недела. Засега не е соопштено во која болница ќе биде извршен зафатот, иако се претпоставува дека тоа ќе биде римската клиника „Џемели“, каде што се наоѓа специјален папски апартман.
Папата Лав XIV има 71 година и беше избран за поглавар на Римокатоличката црква минатата година, по смртта на папата Франциск.
Досега не беше познато дека има здравствени проблеми, а во изминатиот период реализираше повеќе меѓународни посети. За ноември е планирана негова турнеја во Уругвај, Аргентина и Перу, но сè уште не е познато дали операцијата ќе влијае врз нејзината реализација.
Пред да ја соопшти веста за операцијата, папата ја предводеше неделната молитва и се сретна со членовите на религиозното здружение „Братство на Господарот на чудата“, при што им се заблагодари за нивните молитви и ја спомена претстојната посета на Перу.
По објавата, италијанската премиерка Џорџа Мелони му испрати порака со поддршка во име на Владата и лично, истакнувајќи дека неговата смиреност и ведрина претставуваат охрабрување за верниците.
