Одделот за внатрешна контрола, криминалистички истраги и професионални стандарди при Министерството за внатрешни работи утврдил неправилности во постапувањето на полициски службеници при настанот од 7 октомври 2026 година, кога била пријавена прекумерна употреба на физичка сила и нанесување телесни повреди врз лица при извршување на полициски овластувања.
Од МВР информираат дека по извршените проверки, анализата на обезбедените видео-снимки и изјавите од сведоци, констатирани се пропусти во постапувањето на шест полициски службеници.
Поради утврдените неправилности, против нив ќе биде поведена постапка за кршење на работниот ред и дисциплина, а ќе им бидат изречени и мерки за отстранување од работното место, односно суспензија.
Од Министерството додаваат дека во однос на пријавите за можни кривично-правни настани, поднесени до Одделот за внатрешна контрола и Секторот за внатрешни работи Скопје, надлежните обвинителства издаваат наредби за вештачење и се преземаат дополнителни дејствија.
По целосното документирање на доказниот материјал, ќе бидат поднесени соодветни пријави и поднесоци.
