Централната команда на американската војска (CENTCOM) соопшти дека погодила и онеспособила комерцијален товарен брод под панамско знаме во Оманскиот Залив, откако екипажот, според нивните наводи, не ги почитувал предупредувањата и се обидел да ја помине поморската блокада кон Иран.
Според информациите објавени од американската војска, борбен авион погодил прецизно го погодил бродот „Оушн Молика“, познат и како „Арика Сан“, при што бил уништен неговиот погонски систем. Од CENTCOM наведуваат дека сите членови на екипажот останале неповредени.
„Американскиот воен борбен авион го погоди бродот со прецизна ракета, целосно онеспособувајќи го неговиот погон, додека екипажот остана без повреди“, се наведува во соопштението објавено на платформата Икс.
Од американската страна велат дека бродот испловил од иранско пристаниште и се обидел да продолжи низ регионалните води, и покрај претходните предупредувања упатени до морнарите во Оманскиот Залив и во близина на Ормутскиот теснец.
Инцидентот се случува во период на зголемени тензии во регионот, откако бројот на бродови што минуваат низ стратешкиот Ормутски теснец значително се намалил во последните недели.
Според извештаи, нападите врз танкери и нестабилноста во регионот предизвикале загриженост за безбедноста на поморскиот транспорт и можноста за нарушување на глобалното снабдување со нафта.
Ормутскиот теснец е една од најважните енергетски рути во светот, бидејќи низ него пред воените тензии се транспортирале количини на нафта кои сочинуваат околу една петтина од светската потрошувачка.
