Министерството за надворешни работи и надворешна трговија остро ги осуди ракетните напади на Хутите врз меѓународниот аеродром „Крал Калид“ во Ријад и аеродромот во Абха во Саудиска Арабија, оценувајќи дека нападите претставуваат сериозно кршење на меѓународното право.
Во објава на социјалната мрежа Икс, Министерството соопшти дека во нападите имало цивилни жртви, а дополнителна загриженост предизвикала штетата што остатоците од ракетите ја предизвикале врз градинка и медицински комплекс.
„Нападите врз цивили и цивилна инфраструктура претставуваат сериозно кршење на меѓународните норми и меѓународното хуманитарно право“, се наведува во реакцијата.
Од Министерството изразија целосна солидарност со Саудиска Арабија и нејзиниот народ, упатувајќи сочувство до семејствата на загинатите и поддршка до сите погодени од нападите.
Воедно, беше повторена заложбата за почитување на меѓународното право и заштита на цивилното население во услови на вооружени конфликти.
