Градоначалникот на Киев, Виталиј Кличко, ги повика жителите на украинската престолнина кои имаат можност да престојуваат кај роднини или пријатели надвор од градот, да размислат за привремено заминување поради засилените руски напади. Тој појасни дека не станува збор за повик за целосна евакуација на Киев.
Кличко предупреди дека секојдневно пристигнуваат нови извештаи за уништени објекти, повредени и загинати лица, додека гранатирањето врз градот продолжува да се интензивира.
„Денес станува збор за преживување“, порача градоначалникот, објаснувајќи дека жителите кои имаат можност привремено да се преселат надвор од главниот град треба сериозно да ја разгледаат таа опција.
Сепак, тој нагласи дека нема да повика на целосно напуштање на Киев. Според Кличко, рускиот претседател Владимир Путин сака украинските градови да останат празни и на тој начин да бидат предадени на Русија.
Во меѓувреме, градските власти преземаат мерки за подготовка за претстојната зима. Се подготвуваат резервни системи за греење, а се обезбедуваат и залихи на гориво, храна и вода за пиење.
Кличко предупреди дека евентуалното нарушување на водоснабдувањето во Киев може да предизвика сериозна криза, особено во услови на продолжени напади врз инфраструктурата.
