Дваесет и седумгодишен маж е убиен денеска во центарот на Тутлинген, Германија, по вооружен инцидент во кој дошло до престрелка со полициски службеници. Случајот го презеде Државната криминалистичка служба (LKA), која работи на утврдување на сите околности.
Според првичните информации од истрагата, мажот претходно без јасна причина отворил оган кон полицијата. По размената на истрели бил тешко повреден, а медицинските екипи не успеале да го спасат неговиот живот.
„Обидите за реанимација, за жал, не успеаја“, соопштија од LKA.
Сведоци раскажуваат дека мажот бил забележан во просториите на градската управа со пиштол во раката. Вработените веднаш реагирале, повикале полиција и се засолниле во канцелариите.
Откако го напуштил објектот и се движел кон улицата Хелферај, бил пресретнат од полициски патроли. Според информациите на надлежните, тој во тој момент без предупредување стрелал кон полицајците, по што дошло до престрелка.
Инцидентот се случил околу 12:30 часот, а очевидци велат дека слушнале неколку истрели. Во моментот на пукањето, во околните објекти имало голем број луѓе.
Сопственичката на ресторанот „Остерија“, Силке Д’Амико, изјавила дека пукањето се случило непосредно пред нивната тераса.
„Пукаше директно пред нашата тераса“, раскажала таа, додавајќи дека гостите веднаш биле тргнати на безбедно место и дека сите биле во шок.
Од LKA информираат дека засега не е познат мотивот за нападот, ниту причините што го натерале мажот да употреби оружје. Се истражуваат сите детали, а надлежните додаваат дека според досегашните сознанија тој не им се заканувал на случајни минувачи.
