Кошаркарите на ТФТ го добија скопското дерби против Скопје, совладувајќи го вицешампионот со 102-98 во натпревар во кој домашниот состав имаше контрола во најголемиот дел од средбата, но во финишот мораше сериозно да се помачи за победата.
ТФТ одлично го започна дуелот и уште во првата четвртина направи двоцифрена предност од 30-18. Скопје се обиде да го промени текот на натпреварот и во вториот период ја намали негативата, но домаќините повторно одговорија и на паузата заминаа со водство од 52-41.
Тимот од Тафталиџе продолжи во ист ритам и во третата четвртина, кога стигна и до највисоките 17 поени предност при резултат 64-47. Сепак, гостите не се предадоа и со подобра игра успеаја да ја намалат разликата на 74-63 пред последниот период.
Во завршните десет минути Скопје започна со силен налет и постепено ја топеше предноста на ТФТ. Гостите во еден момент се доближија на само два поени негатива, 92-90, но немаа сили за целосен пресврт. ТФТ ги одигра клучните моменти посигурно и на крајот ја зачува победата.
Ѓорѓи Цветковски беше најефикасен во редовите на ТФТ со 24 поени, Вајт оствари дабл-дабл, додека Николов придонесе со 10 поени. На спротивната страна, Паркер одигра одличен натпревар со 31 поен и 12 скока, но неговиот учинок не беше доволен за победа на Скопје.
За вицешампионот ова е втор пораз во новата сезона, откако претходно загуби и од Кожуф.
