Доволниот внес на вода е важен за нормално функционирање на организмот, а правилната хидратација може да има позитивно влијание и врз контролата на крвниот притисок. Сепак, како и кај многу други работи, ниту недостатокот, ниту прекумерното внесување течности не се добри за здравјето.
Високиот крвен притисок или хипертензијата се појавува кога крвта создава поголем притисок врз ѕидовите на крвните садови од нормалното. Покрај терапијата и промените во животниот стил, одржувањето на добра хидратација може да биде еден од факторите што придонесуваат за подобра регулација на притисокот.
Истражувања покажуваат дека лицата со висок крвен притисок често имаат и пониско ниво на хидратација. Кога телото нема доволно вода, се намалува волуменот на крвта и може да дојде до нарушување на балансот на електролити, особено на натриумот.
Покаченото ниво на натриум може да предизвика ослободување на хормонот вазопресин, кој влијае врз задржувањето вода во организмот и стеснувањето на крвните садови. Со внесување доволно вода може да се намалат дел од овие ефекти поврзани со дехидратацијата.
Колку вода треба да се пие дневно?
Општата препорака е околу шест до осум чаши вода дневно, но потребите се различни кај секој човек. Количината зависи од возраста, телесната тежина, физичката активност, климатските услови, како и од посебни состојби како бременост или доење.
Во топли денови или по интензивна физичка активност, потребата за течности може да биде поголема.
Сепак, претераното внесување вода исто така може да создаде проблеми. Прекумерната количина течности во организмот може да доведе до хиперволемија – состојба при која се зголемува волуменот на крвта, што може дополнително да го оптовари кардиоваскуларниот систем и да влијае врз крвниот притисок.
Овој проблем почесто се поврзува со состојби како срцева слабост, заболувања на бубрезите или цироза на црниот дроб, но може да биде поврзан и со прекумерно внесување сол.
Кои други пијалаци можат да помогнат?
Покрај водата, одредени пијалаци може да имаат позитивен ефект врз крвниот притисок.
Сокот од цвекло содржи нитрати кои можат да помогнат во ширење на крвните садови, а некои истражувања укажуваат дека може да придонесе за намалување на систолниот притисок.
Несолениот сок од домати исто така се поврзува со подобрување на одредени показатели поврзани со кардиоваскуларното здравје.
Сокот од калинка, богат со полифеноли и антиоксиданси, може да има позитивно влијание врз крвниот притисок, додека сокот од брусница во одредени студии покажал намалување на притисокот кај лица со прекумерна тежина и хипертензија.
Зелениот и црниот чај, доколку се консумираат редовно, исто така можат да придонесат за подобра контрола на крвниот притисок.
Здравите навики се најважни
Иако хидратацијата е важен дел од грижата за здравјето, таа е само еден фактор. За одржување на нормален крвен притисок се препорачува намалување на внесот на сол, зголемување на внесот на калиум преку овошје и зеленчук, редовна физичка активност и здрава исхрана.
Корисни навики се и откажување од пушење, ограничување на алкохолот, одржување здрава телесна тежина и квалитетен сон од седум до девет часа.
Редовното движење, техниките за релаксација и намалувањето на стресот дополнително можат да придонесат за подобро кардиоваскуларно здравје.
