Започна целосната реконструкција на паркот „Жена борец“ во центарот на Скопје, проект со кој се предвидува обновување на пешачките патеки, урбаната опрема и зелените површини.
Градоначалникот Орце Ѓорѓиевски информираше дека во рамки на зафатот ќе бидат заменети постојните подни плочки и пешачки патеки со мермерни, со цел паркот да добие поуреден и поквалитетен изглед.
Покрај тоа, планирана е реставрација на постојната урбана опрема, како и дополнително хортикултурно уредување на просторот.
Според најавите, реконструкцијата ќе ги опфати и деловите околу Градскиот трговски центар, скалите и друга дотраена инфраструктура во непосредната околина.
Градежните активности веќе се во тек, а за непречено одвивање на работите од паркот привремено се отстранети дел од клупите и корпите за отпадоци.
