Одбраната на Артан Груби, второобвинет во предметот „Државна Лотарија“ до Основниот кривичен суд Скопје понуди гаранција во недвижен имот вреден 335.707 евра за укинување на дополнителната мерка на претпазливост за поранешниот вицепремиер.
Од Судот информираат дека против обвинетиот, покрај куќниот притвор, е определена и мерка привремено одземање на патната исправа и забрана за издавање патна или друга исправа за преминување на државната граница.
Мерката куќен притвор за Груби, според Судот, истекува на 13 октомври 2026 година, но дополнителната мерка на претпазливост, продолжува да важи и по истекот на овие 60 дена, а по понудената гаранција е оформен предмет, кој е доставен на мислење до надлежното јавно обвинителство по што треба да се произнесе Кривичниот совет.
