Џеф Безос повторно се искачи на второто место на листата на најбогатите луѓе во светот, покажува најновото рангирање на „Форбс“, кое донесе промени кај седум од десетте милијардери во светскиот врв.
Основачот на „Амазон“ во изминатиот месец го зголемил своето богатство за околу 102 милијарди долари, достигнувајќи проценети 370 милијарди долари. Најголем придонес за растот имаат новите проценки на вредноста на неговата вселенска компанија „Blue Origin“ и стартапот за индустриска вештачка интелигенција „Prometheus“.
Со тоа, Безос за првпат од мај 2025 година повторно е втор најбогат човек во светот, пред Лери Пејџ, чие богатство е проценето на околу 286 милијарди долари.
На четвртата позиција се наоѓа Мајкл Дел со богатство од 268 милијарди долари, откако акциите на „Dell Technologies“ значително пораснаа поради зголемената побарувачка за сервери наменети за вештачка интелигенција.
Петтото место му припаѓа на Сергеј Брин со 263 милијарди долари, додека Марк Закерберг останува шести со богатство од 251 милијарда долари, поттикнато од растот на акциите на „Мета“.
На самиот врв и понатаму е Илон Маск, чие богатство се проценува на 936 милијарди долари. Само во текот на последниот месец тој станал побогат за околу 44 милијарди долари, главно благодарение на растот на вредноста на „SpaceX“.
Во топ 10 повторно се врати Ворен Бафет, додека од листата испадна шпанскиот моден магнат Амансио Ортега поради намалување на неговото богатство.
„Форбс“ пресметува дека вкупното богатство на десетте најбогати луѓе во светот достигнало 3,1 трилиони долари, што е раст во однос на претходниот месец, кога изнесувало 2,8 трилиони долари.
Топ 10 најбогати луѓе во светот:
Илон Маск
Џеф Безос
Лери Пејџ
Мајкл Дел
Сергеј Брин
Марк Закерберг
Џенсен Хуанг
Лери Елисон
Стив Балмер
Ворен Бафет
Сите десетмина на листата се американски државјани, а шестмина од нив располагаат со богатство поголемо од 200 милијарди долари.
