Државниот инспекторат за земјоделство од почетокот на годинава до 15 септември спровел 873 вонредни инспекциски контроли кај регистрирани откупувачи на земјоделски производи, при што биле утврдени повеќе неправилности во работењето.
Директорот на Инспекторатот, Ивица Ангеловски, информираше дека по извршените контроли се изречени 30 инспекциски мерки и се издадени 17 платни налози.
Најчестите прекршувања се однесувале на откуп без склучени договори со земјоделските производители, неисплатени обврски и непочитување на законските рокови за исплата, како и неизложување на ценовници.
Инспекторите, исто така, констатирале случаи на користење неверификувани мерни инструменти, како и откуп на земјоделски производи од субјекти кои не биле запишани во регистарот на откупувачи.
Од вкупно издадените 17 платни налози, три веќе се платени, додека за останатите се водат соодветни прекршочни постапки.
Ангеловски најави дека инспекциските контроли ќе продолжат и во наредниот период со цел да се обезбеди поголема заштита на правата и интересите на земјоделските производители.
Покрај инспекцискиот надзор, Државниот инспекторат за земјоделство активно учествува и во постапките за извоз на земјоделски производи преку издавање фитосанитарни сертификати.
