Министерот за внатрешни работи Панче Тошковски го посети фестивалот „Мото Илинден Урбан драјв“, кој до 4 октомври се одржува на паркингот пред спортскиот центар „Борис Трајковски“ во Скопје.
Настанот е посветен на промоција на мотоциклизмот, но и на подигнување на свеста за поголема безбедност на сите учесници во сообраќајот.
Тошковски порача дека љубовта кон мотоциклите мора да биде проследена со одговорно однесување и почитување на сообраќајните правила.
„Кацигата и заштитната опрема, почитувањето на ограничувањето на брзината и сообраќајните правила не се формалност – тие спасуваат животи“, изјави министерот.
Од Министерството за внатрешни работи информираат дека во рамки на засилените сообраќајни контроли посебно внимание се посветува на мотоциклистите и возачите на мопеди. Контролите се насочени кон проверка на брзината, поседувањето соодветна возачка дозвола, користењето заштитна кацига и почитувањето на останатите правила.
Дополнително, системот „Безбеден град“ веќе ги евидентира прекршоците направени од возачи на мотоцикли. Според најавите на Тошковски, со надградбата со вештачка интелигенција системот во иднина ќе може да препознава и случаи кога возачите не користат кацига.
Министерот информираше и за подобрувањето на безбедносната состојба на патиштата. Според податоците што ги презентираше, во првите девет месеци од годинава во сообраќајот има 33 жртви помалку во однос на истиот период минатата година, што претставува намалување од околу 30 проценти.
Во истиот период, бројот на повредени лица во сообраќајни незгоди е намален за околу 19 проценти.
Тошковски оцени дека во овој позитивен тренд се вклучени и сообраќајните незгоди во кои учествуваат мотоциклисти, додавајќи дека институциите ќе продолжат со мерки за дополнително зголемување на безбедноста во сообраќајот.
