Денеска се навршуваат 31 година од атентатот врз првиот претседател на независна Македонија, Киро Глигоров – еден од најтешките и најнеразјаснетите настани во поновата македонска историја.
Атентатот беше извршен на 3 октомври 1995 година, околу 9:50 часот, на улицата „Македонија“, пред хотелот „Бристол“ во Скопје. Во моментот кога службеното возило на Глигоров се движело кон Собранието, била активирана автомобил-бомба поставена во „цитроен ами 8“, во кој биле скриени околу 20 килограми експлозив. Според истрагата, експлозивната направа била активирана со далечински управувач, а непосредно пред експлозијата движењето на колоната било забавено од автомобил „фиќо“.
Глигоров го преживеа нападот, но се здоби со тешки повреди на главата. На местото на експлозијата загина неговиот возач Александар Спировски, додека телохранителот Илчо Теовски беше тешко повреден.
Иако истрагата утврди дека станува збор за внимателно испланиран и организиран атентат, ниту по повеќе од три децении не е откриено кој стои зад нападот.
Во рамки на истрагата беа преземени обемни активности. Беа претресени 30.850 возила, извршени проверки на повеќе од 15.000 објекти, легитимирани над 188.000 лица, а околу 19.000 лица беа и претресени.
По неколкумесечно лекување, Киро Глигоров на 10 јануари 1996 година се врати на извршувањето на претседателската функција. По завршувањето на вториот мандат во 1999 година, функцијата ја презеде Борис Трајковски.
Глигоров останува запаметен како првиот претседател на независна Македонија и како политичар кој одигра клучна улога во мирното осамостојување на државата од поранешна Југославија. Почина на 1 јануари 2012 година, на 94-годишна возраст.
