Во Кочани денеска беше пуштен во употреба нов Дневен центар наменет за лица со попреченост, кој треба да обезбеди поддршка, социјализација и активности за подобрување на самостојноста на корисниците.
На отворањето присуствуваа министерот за социјална политика, демографија и млади Ѓоко Велковски, градоначалникот на Општина Кочани Владко Грозданов и генералниот секретар на Црвениот крст на Република Македонија, Саит Саити.
Министерот Велковски информираше дека Центарот ќе нуди активности за личен развој, социјална интеграција и поддршка приспособена според индивидуалните потреби и можности на секој корисник.
„Има капацитет за 12-мина корисници месечно и е наменет за лицата над 26-годишна возраст, со тешка телесна, интелектуална или со комбинирана попреченост“, истакна Велковски.
Тој посочи дека отворањето на вакви центри не претставува само воведување нова социјална услуга, туку создавање услови за поголема вклученост на лицата со попреченост и поддршка за нивните семејства.
„Тие значат создавање можности, поддршка за семејствата и градење општество во кое секој човек има еднаква можност да биде активен и вклучен во заедницата“, рече Велковски.
Од Министерството за социјална политика, демографија и млади нагласуваат дека продолжуваат со развој и проширување на социјалните услуги кои ќе бидат достапни поблиску до граѓаните, во нивните локални средини.
