Националниот здравствен информатички систем „Мој Термин“ во период од повеќе од пет години функционирал без договор за одржување вкупно 738 дена, односно речиси 38 отсто од анализираниот период, покажува извештајот на Државниот завод за ревизија.
Ревизорите утврдиле повеќе проблеми поврзани со управувањето со системот, недостигот на кадар, ИТ-безбедноста, заштитата на медицинските и личните податоци, како и обезбедувањето стабилно функционирање на платформата што се користи во здравствениот сектор.
За одржување на „Мој Термин“ и останатите информациски системи во јавните здравствени установи, во периодот опфатен со ревизијата биле склучени договори во вредност од 333,3 милиони денари, или околу 5,42 милиони евра. Од овие средства, само девет проценти биле наменети директно за националниот здравствен информатички систем, додека останатите 91 процент се однесувале на други системи во јавното здравство.
Според ДЗР, договорите за одржување се склучувале на годишна основа, без обезбеден долгорочен континуитет. Дополнително, во анализата не биле вклучени трошоците за апликативните решенија што ги користат матичните лекари и приватните здравствени установи.
Ревизорите предупредуваат и на ризик од зависност од ограничен број компании, бидејќи 48 проценти од вложувањата во информациските системи кај јавните здравствени установи биле концентрирани кај три софтверски компании.
Проблеми биле констатирани и со кадровските капацитети во Управата за електронско здравство. Од предвидените работни места биле пополнети само 29 проценти, а дел од потребите се надополнувале преку договори на дело. При тоа, не била изработена функционална анализа за реалните потреби од кадар.
ДЗР утврдил дека Управата за електронско здравство е задолжена за развој и унапредување на интегрираниот здравствен информатички систем, но нема надлежност да ги спроведува јавните набавки поврзани со „Мој Термин“.
Ревизијата отвора прашања и околу заштитата на самиот назив на системот. Името „Мој Термин“ не било регистрирано од надлежните институции, туку од економски оператор со кој Министерството за здравство склучува договори за одржување. Во 2024 година операторот го регистрирал називот во Државниот завод за индустриска сопственост и започнал постапка за регистрација на логото.
Дополнителен проблем е што не постојат воспоставени стандарди за сертификација и одобрување на софтверските решенија што се користат во јавното здравство, ниту механизми за проверка на точноста на внесените податоци.
При контролите во здравствените установи, ревизорите утврдиле и неправилности во начинот на користење на системот. Во дел од установите немало листи на закажани прегледи, што создава ризик пациенти без уреден термин да добијат предност пред оние кои подолго време чекаат на закажан преглед.
Анализата на СМС-системот покажала дека во ГОБ „8 Септември“ – Скопје, во првите четири месеци од 2026 година, потсетувачки СМС пораки биле испратени само за 10,1 отсто од реализираните упати.
ДЗР утврдил и дека во системот „Мој Термин“ не биле внесени податоци за хируршки интервенции од ГОБ „8 Септември“ за периодот од 2021 до 2025 година, иако болницата е меѓу најоптоварените здравствени установи во државата.
Според ревизијата, ниту листите на чекање за оперативни зафати не ја прикажуваат целосно реалната состојба, бидејќи недостигаат важни податоци, како датумот на упатот и вкупниот број закажани операции.
Слабости биле утврдени и во контролите што ги спроведува Министерството за здравство. Во 2023 година биле реализирани само 24 од планираните 62 контроли, додека во следните години не биле донесени годишни планови ниту биле спроведени проверки.
Посебна загриженост во извештајот е изразена за ИТ-безбедноста и заштитата на личните податоци. ДЗР наведува дека не биле воспоставени доволни процедури за управување со корисничките пристапи, следење на активностите во системот и заштита на чувствителните медицински информации.
