Тројца луѓе биле пренесени во болница откако почувствувале кожни иритации по отворање сомнителна поштенска пратка во седиштето на Воената полиција во Нова Демба, во југоисточна Полска.
Инцидентот се случил на 30 септември, а според информациите на полското радио РМФ ФМ, пратката пристигнала од Германија и содржела разгледница.
При отворањето на пликот не била забележана никаква истурена супстанција, но двајца припадници на воената полиција и еден цивил кој се наоѓал во просторијата почувствувале иритација на кожата на лицето и рацете. Тие веднаш биле упатени на медицински преглед.
Како дополнителна мерка на претпазливост, четворица припадници на полиција биле изолирани, иако кај нив не биле забележани симптоми. Од соседниот дел на објектот биле евакуирани 133 лица, а на терен излегле специјализирани екипи за хемиска заштита.
За случајот биле известени полската Агенција за внатрешна безбедност и Службата за воено контраразузнавање, кои работат на утврдување на сите околности поврзани со инцидентот.
Засега нема официјална потврда за тоа дали во пратката имало опасна материја, ниту дека станува збор за намерно предизвикан настан. Ангажирањето на специјализирани тимови е стандардна безбедносна процедура и само по себе не значи дека постои потврдена хемиска, биолошка или друга закана.
