Претседателката Гордана Сиљановска-Давкова престојува во работна посета на Австрија, каде што учествува на 22. Европски самит во Салцбург.
Според информациите од нејзиниот кабинет, таа ќе се обрати на сесијата посветена на темата „Дали Европа (сè уште) е глобален играч?“, во рамки на годишниот собир што го организира Институтот на регионите на Европа.
Годинашниот самит се одржува под мотото „Европа – суверен глобален играч?“, а во фокусот на дискусиите се безбедноста на континентот, економската конкурентност, демографските предизвици и процесот на проширување на Европската Унија.
За време на престојот во Салцбург, Сиљановска-Давкова ќе оствари средби со претседателот на Институтот на регионите на Европа, Франц Шаусбергер, како и со гувернерката на покраината Салцбург, Каролин Етстадлер. На агендата е и учество на Глобалниот семинар во Салцбург.
Во пресрет на самитот, претседателката се сретна со припадници на македонската заедница во Халејн, каде неодамна беше формирана новата македонска православна црковна општина „Св. Архангел Михаил“.
За време на средбата, таа разговараше со иселениците за Националната стратегија за дијаспора, Советот за дијаспора, измените во Изборниот законик и евроинтегративниот процес на државата.
Македонските иселеници ја запознаа претседателката со нивниот живот и работа во Австрија, а изразија и благодарност до Маркус Данер, раководител на Парохискиот сојуз на Халејн, кој овозможил простории од Католичката црква да се користат за богослужби на македонската православна заедница.
