Европската Унија се соочува со нов притисок на енергетскиот пазар, откако цените на природниот гас достигнаа нивоа што не се забележани од енергетската криза во 2022 година.
Европскиот комесар за енергетика Дан Јоргенсен ги повика земјите-членки да разгледаат мерки за намалување на потрошувачката на гас и електрична енергија, како и за дополнително полнење на резервите.
Според податоците, складиштата за гас во Европа во моментов се исполнети околу 70 проценти, додека цената на гасот на холандскиот референтен пазар TTF со недели се задржува над 70 евра за мегават-час.
„Се соочуваме со ценовна криза која е поврзана со криза во снабдувањето“, предупреди Јоргенсен во писмо до министрите за енергетика на земјите од ЕУ.
Тој посочи дека ситуацијата е дополнително отежната поради напнатоста на глобалниот пазар на течен природен гас, но и поради екстремно топлото и суво лето, кое создаде дополнителен товар врз енергетските системи на дел од европските држави.
Меѓу мерките што ги предлага европскиот комесар се поттикнување на домаќинствата да ја намалат потрошувачката во периоди на најголема побарувачка, ограничување на греењето во јавните објекти и исклучување на непотребното јавно осветлување во текот на ноќта.
Целта на овие мерки е да се намали употребата на гас за производство на електрична енергија и да се обезбеди поголема стабилност на енергетскиот систем.
И покрај предупредувањата, Јоргенсен нагласи дека во моментов нема непосредна опасност за безбедноста на снабдувањето со енергија.
Министрите за енергетика на ЕУ ќе разговараат за состојбата на неформален состанок во Ирска на 29 септември, каде што се очекува да бидат разгледани дополнителни чекори за стабилизирање на пазарот.
