Пензиите од септември ќе бидат повисоки за 3 проценти, потврди директорот на Фондот за пензиското и инвалидското осигурување (ПИОМ), Никола Мемов. Зголемувањето ќе се пресметува согласно законската методологија, без примена на линеарен модел.
Тоа значи дека висината на покачувањето ќе зависи од износот на пензијата што ја прима секој пензионер. На пример, пензија од 20.000 денари ќе биде зголемена за 600 денари.
Новите износи ќе почнат да се применуваат со следната исплата на пензиите, а во ПИОМ веќе се изработуваат пресметките за навремена реализација на исплатата.
Од Фондот посочуваат дека конечниот износ што ќе го добива секој пензионер ќе зависи од неговата актуелна пензија, бидејќи покачувањето се пресметува процентуално.
Во изминатите две години пензиите четири пати беа зголемувани по линеарен принцип, при што вкупното покачување достигна 7.000 денари.
Прашањето за законитоста на линеарното зголемување беше предмет и на постапка пред Уставниот суд. Судот минатата година поведе постапка за оценување на ова решение, но во март 2026 година ја запре постапката, откако не беше обезбедено потребното мнозинство за донесување конечна одлука.
