Генералниот секретар на Обединетите нации, Антонио Гутереш, во своето последно обраќање пред Генералното собрание на ОН упати силен повик за прекин на вооружените конфликти, засилена борба против климатските промени, одговорен развој на вештачката интелигенција и темелни реформи на меѓународните институции.
Говорот беше дел од завршницата на неговото десетгодишно раководење со светската организација, а неговиот втор петгодишен мандат завршува на 31 декември годинава.
Осврнувајќи се на состојбите на Блискиот Исток и безбедноста на меѓународните поморски патишта, Гутереш повика на итна деескалација и дијалог.
„Борбите мора да престанат. Хуманитарната помош мора непречено да пристигнува, а правата и слободата на пловидба мора целосно да бидат обновени во согласност со меѓународното право“, порача генералниот секретар.
Неговото залагање за решение со две држави – Израел и Палестина, како и ставот дека најголемите загадувачи треба да ја преземат одговорноста за последиците од климатските промени, беа поздравени со аплауз од делегатите.
Гутереш повторно предупреди и на ризиците од брзиот развој на вештачката интелигенција, нагласувајќи дека земјите кои ја предводат технолошката револуција мора да соработуваат, да разменуваат информации за безбедносните ризици и да воспостават заеднички механизми за заштита.
Тој повика на создавање глобална рамка за управување со вештачката интелигенција, заснована на меѓународна соработка, дополнителни безбедносни мерки и независен надзор.
Во своето обраќање, Гутереш предупреди и дека сегашните глобални институции сè уште ги одразуваат политичките и геополитичките односи од минатото и дека се неопходни реформи за поефикасно справување со современите предизвици.
На крајот од говорот, тој се збогуваше со светските лидери со кои соработуваше во изминатата деценија, истакнувајќи дека и по завршувањето на мандатот ќе продолжи да се залага за мир, меѓународна соработка и вредностите на Повелбата на Обединетите нации.
На овогодинешното заседание на Генералното собрание во Њујорк учествуваат речиси 130 светски лидери, додека меѓу отсутните се претставници на неколку големи држави, меѓу кои Кина, Индија, Јужна Африка и Германија.
