Министерството за внатрешни работи денеска спроведува координирана акција на повеќе локации во рамки на истрага за сомневања за незаконско издавање и фалсификување возачки дозволи за Ц и Д категорија.
Од МВР информираат дека во тек се претреси со цел обезбедување материјални докази и целосно расчистување на случајот.
Акцијата е продолжение на истрагата што ја води Внатрешната контрола на Министерството, започната минатиот месец. Според првичните сознанија, одредени вработени во управните служби незаконски впишувале повисоки категории во возачките дозволи на лица кои немале положено соодветен возачки испит за управување со камиони или автобуси.
Од Министерството засега не соопштуваат повеќе информации, посочувајќи дека акцијата сè уште е во тек и дека дополнителни детали ќе бидат објавени по завршувањето на оперативните активности.
