Претставниците на превозниците од Македонија, Србија, Босна и Херцеговина и Црна Гора одлучија да не го реализираат најавениот протест на 14 септември 2026 година, кој требаше да вклучува затворање на граничните премини кон земјите од Европската Унија.
Одлуката е донесена по средбата со претставници на дел од државите членки на Шенген зоната, организирана преку Мисијата на Европската Унија со седиште во Белград, соопшти Асоцијацијата Макам-транс.
Од асоцијацијата посочуваат дека со овој чекор превозниците покажале добра волја и разбирање за можните последици што би ги предизвикал прекинот на транспортот и снабдувањето со стока меѓу земјите од Западен Балкан и Европската Унија.
Воедно, тие изразиле доверба во ветувањата дека ќе се забрза процесот за изнаоѓање решение за проблемот со ограничениот престој на професионалните возачи во Шенген зоната, кој во моментов е ограничен на правилото 90/180 дена.
Според Макам-транс, очекувањата се дека ова прашање ќе биде решено до усвојувањето на новата визна стратегија, што се планира во втората половина на 2027 година.
„Сите подготовки за спроведување на протестот се ставени вон сила на одреден период“, информираа од Макам-транс.
Превозниците од регионот на 1 септември организираа предупредувачки протест, барајќи трајно решение за ограничувањата со кои се соочуваат професионалните возачи при престојот во земјите од Шенген зоната.
