Дваесет и пет години по терористичките напади од 11 септември 2001 година, светот и натаму ги чувствува последиците од еден од најтрагичните настани во поновата историја. Нападите врз САД не само што однесоа речиси три илјади животи, туку предизвикаа длабоки безбедносни, политички и стратешки промени на глобално ниво.
По нападите, САД ја променија својата воена доктрина и ја започнаа таканаречената Глобална војна против тероризмот. Во октомври 2001 година започна воената интервенција во Авганистан, а во 2003 година следуваше и инвазијата врз Ирак, врз основа на политиката на превентивни воени дејствија.
Нападите доведоа и до историска одлука на НАТО. За првпат од формирањето на Алијансата беше активиран членот 5 од Северноатлантскиот договор, според кој напад врз една членка се смета за напад врз сите. На 4 октомври 2001 година оваа одлука стана оперативна, отворајќи пат за заедничко дејствување на сојузниците против тероризмот.
На 11 септември 2001 година, 19 припадници на терористичката организација Ал Каеда киднапираа четири патнички авиони и извршија координирани самоубиствени напади. Во трагедијата загинаа 2.996 лица, меѓу кои и 19-те киднапери, а жртви имаше од повеќе од 90 држави.
Два од авионите удрија во Кулите близначки на Светскиот трговски центар во Њујорк. Првиот удар се случи во 8:46 часот по локално време, кога Боинг 767 на „Американ ерлајнс“ ја погоди Северната кула, предизвикувајќи голем пожар.
Само 17 минути подоцна, втор авион на „Јунајтед ерлајнс“ удри во Јужната кула. По вториот удар стана јасно дека станува збор за координиран терористички напад.
Во 9:37 часот трет киднапиран авион удри во Пентагон, седиштето на Министерството за одбрана на САД, предизвикувајќи голема материјална штета и човечки жртви.
Четвртиот авион, кој според истрагата најверојатно бил насочен кон Белата куќа или Капитол, никогаш не ја достигна целта. Патниците и членовите на екипажот им се спротивставија на киднаперите, по што авионот се урна во близина на Шенксвил, Пенсилванија.
Нападите од 11 септември остануваат најсмртоносниот терористички чин во историјата и настан што трајно го промени начинот на кој државите гледаат на безбедноста, борбата против тероризмот и меѓународната соработка.
