Дебарското спортско риболовно друштво „Трофта“ објави вознемирувачко видео на социјалните мрежи, на кое се гледа како несовесен граѓанин фрла поголема количина отпад директно во реката Радика.
Според снимката, маж со комби возило застанува на мостот кај каменоломот во Косоврасти, по што од возилото вади вреќи и кутии полни со отпад и без двоумење ги фрла во реката. Потоа го напушта местото на настанот.
Од спортското риболовно друштво остро го осудија ваквото однесување, посочувајќи дека Радика е една од најчистите и најубавите реки во Македонија и дека ваквите постапки претставуваат директно уништување на природата.
„Срамно! Ова е реката Радика – една од најчистите и најубавите реки во Македонија. Да фрлаш ѓубре во реката не е ‘ништо страшно’ – тоа е срам и непочитување кон природата, рибите и нашата иднина. Радика не е место за ѓубре“, порачаа од „Трофта“.
Од друштвото упатија апел до граѓаните за поголема грижа кон животната средина и порачаа дека природните богатства мора да се зачуваат за идните генерации.
„Да го заштитиме она што природата ни го дарувала“, порачуваат од дебарското спортско риболовно друштво.
