Шеесет и петгодишен државјанин на Македонија бил уапсен по слетувањето на меѓународен лет кон аеродромот во Загреб, под сомнение за сексуално злоставување на малолетно девојче.
Според информациите од хрватските медиуми, инцидентот се случил за време на летот, а случајот бил откриен откако 15-годишна девојка, која патувала сама, побарала помош од член на кабинскиот екипаж.
Девојчето ѝ го дало својот мобилен телефон на стјуардесата со порака на екранот: „Преплашена сум од овој човек; можете ли некако да ми помогнете?“.
Стјуардесата, без да предизвика дополнителна реакција кај патникот кој седел до девојчето, ја одвела малолетничката во пилотската кабина. Таму таа објаснила дека постар маж кој седел до неа набрзо по полетувањето наводно започнал со несоодветно допирање, при што се претставил дека ѝ помага околу безбедносниот појас.
По добиените информации, од кабината веднаш била известена контролата на летање на аеродромот „Фрањо Туѓман“ во Загреб. По слетувањето, осомничениот бил пречекан од полициски службеници и одведен на разговор.
Мажот ги негирал наводите и изјавил дека не ја допрел девојката, туку само ѝ помогнал со појасот, кој таа потоа сама го закопчала.
Сепак, случајот продолжил како кривична истрага. Осомничениот бил однесен во криминалистичка полиција, потоа во надлежното обвинителство и пред суд, по што му била одредена мерка притвор и бил спроведен во затворот „Реметинец“.
Надлежните органи продолжуваат со постапката за целосно расчистување на случајот.
