На судењето на апелацискиот судија Ѓоко Ристов беа споменати повеќе звучни имиња од политичкиот и бизнис-живот, откако обвинителството презентираше дел од контактите пронајдени во неговиот телефонски именик.
Обвинителката Искра Хаџи-Василева пред судот ги прочита имињата на Бојан Јовановски – Боки 13, Ана Камчева, сопруга на бизнисменот Орце Камчев, како и пратеникот на ДУИ Исмаил Јахоски, кој во именикот бил запишан како „бабе Исмаил“.
Меѓу контактите се нашол и неговиот син, бизнисменот Асмир Јахоски, сопственик на „Пуцко Петрол“, кој беше обвинет во случај поврзан со набавка на мазут, како и бизнисменот Зоран Азманов.
Обвинителството ги спомена и имињата на Фехми Стафа, кој се поврзува со случајот за наводен поткуп поврзан со Љупчо Пецов – Ѓаволот, потоа Исмет Гури, поранешен директор на Управата за јавни приходи и функционер на ДУИ, на кого му се судеше во предметот „Титаник 3“, како и поранешната пратеничка Фросина Ременски.
Во именикот на судијата бил пронајден и телефонскиот број на Вице Заев, брат на поранешниот премиер и лидер на СДСМ, Зоран Заев.
Обвинителството нагласи дека на рочиштето не биле презентирани докази за комуникација меѓу Ристов и наведените лица, туку само нивното постоење во неговиот телефонски именик.
Сепак, обвинителката посочи дека ваквите контакти можат да бидат предмет на етичка и законска анализа, имајќи предвид дека судскиот процес се однесува на обвиненија поврзани со коруптивни практики.
