Силниот ветер дополнително го разгоре пожарот кај штипското село Селце, поради што противпожарните екипи се соочуваат со исклучително тешки услови на терен. Поради влошената состојба, во гаснењето се вклучени уште поголем број професионални и доброволни пожарникари, а поддршка пристигнува и од воздух.
Директорот на Дирекцијата за заштита и спасување, Стојанче Ангелов, информира дека во овој момент најважна задача е заштитата на викенд-населбата во близина на пожарот, која во еден момент била директно загрозена од огнената стихија.
„Пожарникарите со огромен напор и пожртвуваност успеаја да ја запрат линијата на огнот. Постоеше сериозна опасност пожарот да ги зафати викендиците, кои по број се повеќе од едно големо македонско село“, изјави Ангелов.
Според него, ситуацијата засега е ставена под контрола, а на повеќе критични точки се распоредени доволен број пожарникари кои непрекинато работат на локализирање на огнот и спречување на неговото понатамошно ширење.
Во акцијата за гаснење се ангажирани и хеликоптери, кои од воздух интервенираат на најтешко пристапните делови од теренот.
Сепак, Ангелов предупредува дека опасноста сè уште не е целосно отстранета. Пожарот продолжува да се движи во правец кон планината Серта, подрачје кое и во минатото било често погодено од големи шумски пожари.
„Засега имаме контрола, но силниот ветер може брзо да ја промени состојбата. Постојано ја следиме ситуацијата и сме подготвени да реагираме доколку огнот повторно се разгори“, истакна Ангелов.
Надлежните апелираат граѓаните да не се движат во близина на пожариштето и да ги почитуваат упатствата на службите, додека противпожарните екипи продолжуваат со интензивната борба за целосно локализирање на огнот.
