Фондот за здравствено осигурување (ФЗО) во текот на август годинава исплати 623.150.780 денари по основ на надоместок на плата за привремена спреченост за работа.
Од вкупната сума, најголем дел – 414.050.780 денари, биле наменети за надоместоци за породилни отсуства, информираат од Фондот.
Од ФЗО посочуваат дека станува збор за исклучително висока месечна реализација, која била постигната преку засилена обработка на предметите и внимателно планирање на расположливите средства, со цел исплатите кон осигурениците да се одвиваат редовно и без прекини.
При обработката на барањата, како што наведуваат од институцијата, бил почитуван хронолошкиот редослед, односно приоритет им бил даден на осигурениците чии предмети биле поднесени во најстар период.
„Со ваквата динамика, Фондот создаде услови надоместоците за боледување, а особено надоместоците за породилно отсуство, да се исплаќаат тековно и редовно“, соопштија од ФЗО.
Посебен акцент бил ставен на исплатата на породилните надоместоци, согласно насоките на генералниот директор на Фондот, Златко Перински.
Од ФЗО велат дека со ефикасно управување со средствата во август биле обезбедени повеќе од 414 милиони денари само за породилни надоместоци, без да се наруши редовното исполнување на останатите финансиски обврски кон осигурениците и здравствениот систем.
Од Фондот најавуваат дека ваквиот начин на работа ќе продолжи и во следниот период, со цел да се обезбеди побрза обработка на барањата и навремена исплата на средствата.
„Редовната исплата на боледувањата, со посебен фокус на породилните надоместоци, останува еден од приоритетите на раководството на Фондот. Зад овие бројки стојат осигуреници и семејства за кои навремената исплата значи сигурност во период кога им е најпотребна“, наведуваат од ФЗО.
Од институцијата додаваат дека продолжуваат со унапредување на организацијата и ефикасноста во работењето, со цел пократко време на обработка на предметите и поголема сигурност за корисниците на здравственото осигурување.
