Мртво бебе, за кое првично се проценува дека било на возраст од осум до девет месеци, било пронајдено во стан во атинската населба Кипсели, скриено во сад кој бил ставен во куфер. Случајот го истражува грчката полиција, а обдукцијата покажала дека бебето починало како последица на тешки повреди нанесени со остар предмет.
Телото било пронајдено доцна синоќа во стан за краткорочно изнајмување, откако сопственикот ја известил полицијата дека станарите не ја платиле киријата и дека постои сомнеж за користење дрога.
При полицискиот претрес, во еден од куферите бил пронајден сад со телото на бебето.
Во станот престојувале шест лица – Грк, Германка, 26-годишен Авганистанец и три малолетни деца: бремена 15-годишна девојка и две момчиња на девет и 12 години.
Според грчките медиуми, Германката пред полицајците изјавила дека бебето било нејзино и дека починало пред неколку месеци. Авганистанецот, пак, рекол дека е партнер на 15-годишното девојче.
Обдукцијата покажала дека бебето имало повеќекратни повреди и дека смртта настапила како последица на нив. Поради состојбата во која било пронајдено телото, засега не може прецизно да се утврдат ниту возраста на бебето, ниту точниот период кога настапила смртта.
Тројцата возрасни биле приведени поради сомнежи поврзани со поседување и употреба на дрога, додека полицијата и обвинителството продолжуваат да ги истражуваат сите околности поврзани со смртта на бебето.
Трите деца, по наредба на јавен обвинител, биле пренесени во детска болница. Грчките медиуми објавија и дека кај две од децата биле откриени сексуално преносливи инфекции.
Претседателот на Грчката федерација на вработените во јавните болници, Михаилис Јанакос, изјавил дека децата се наоѓаат во лоша физичка и психичка состојба и дека постојат сомнежи дека можеби биле жртви на сексуална злоупотреба. Овие наводи допрва треба да бидат потврдени од надлежните институции.
Истрагата треба да утврди кому му припаѓало бебето, кога и како настапила смртта, какви биле односите меѓу лицата кои престојувале во станот, како и дали малолетните деца биле изложени на злоупотреба или друга форма на насилство.
Полицијата врши дополнителни проверки и во друг стан во кој дел од лицата престојувале претходно. Сите околности на случајот сè уште се предмет на истрага.
