Пожарот што избувна од преспанската страна на Пелистер и се движи кон Националниот парк „Пелистер“ и понатаму претставува најтежок и најкомплексен пожар за гасење во земјава, информираше директорот на Дирекцијата за заштита и спасување, Стојанче Ангелов.
Во гаснењето на огнената стихија се вклучени копнени сили, механизација, ер-трактори на ДЗС, како и армиски хеликоптер. Во текот на утрото хеликоптерот успешно интервенирал на неколку критични точки со прецизно исфрлање вода, но поради високите температури повторно се активирале делови од пожарот, при што чад се појавил на повеќе локации.
На терен се ангажирани пожарникари од Битола и Ресен, огнени тимови на Дирекцијата за заштита и спасување, доброволни пожарникари, како и голем број лица со механизација.
Со помош на булдожери е направена противпожарна пресека над боровата шума, со цел да се запре натамошното ширење на огнената линија и да се заштитат загрозените подрачја.
Ангелов информираше и за повредено лице ангажирано во интервенцијата, појаснувајќи дека не станува збор за пожарникар, туку за возач на булдожер.
„Возачот при скок од булдожерот ги повредил ребрата. Според информациите, најверојатно станува збор за напукнати ребра, но нема скршени ребра. Тој е згрижен во болница и се чувствува добро“, изјави Ангелов.
Тој нагласи дека станува збор за недоразбирање во дел од информациите што се појавија во јавноста и категорично демантираше дека во гаснењето на пожарот има повредени пожарникари.
Пожарот на Пелистер останува под постојан надзор, а екипите продолжуваат со борбата против огнената стихија.
