Пожарот што избувна во атарот на ресенското село Макази и се прошири кон Националниот парк „Пелистер“ е ставен под контрола по повеќечасовна координирана акција на повеќе служби. Во интервенцијата се повредени двајца припадници на екипите кои учествувале во гаснењето, но нивната здравствена состојба е стабилна.
Според директорот на Националниот парк „Пелистер“, Иванчо Тошевски, пожарот избувнал во попладневните часови на 29 август во близина на овоштарници со јаболка кај селото Макази, а поради силниот ветер брзо се проширил кон Претор и планинскиот масив.
Огнот истовремено се појавил на повеќе локации, создавајќи долга огнена линија која навлегла на територијата на Националниот парк „Пелистер“, зафаќајќи го просторот меѓу подножјето на врвот Вртушка и Мала Чука.
Во текот на ноќта и денеска, благодарение на координираната интервенција, пожарот бил локализиран, но дежурните екипи остануваат на терен поради опасноста од повторно активирање.
Во гаснењето учествуваа екипи на Националниот парк „Пелистер“, Територијалните противпожарни единици од Битола и Ресен, огнен тим на Дирекцијата за заштита и спасување, како и јавни претпријатија и приватни компании од Битола со механизација и човечки ресурси, организирани од Општина Битола.
Поддршка беше обезбедена и од воздух, каде што интервенираа двата ер-трактори.
„Опасноста од повторно активирање и ширење на пожарот и понатаму е голема и во најголема мера ќе зависи од временските услови“, изјави директорот на Националниот парк „Пелистер“, Иванчо Тошевски.
