Големиот пожар што вчера повеќе од 13 часа беснееше на подрачјето меѓу селата Долно и Горно Чичево во Општина Градско, доцна синоќа околу 22:20 часот беше целосно локализиран и изгаснат.
Во гаснењето учествуваа екипи на Територијалната противпожарна единица Велес, на кои им се приклучија пожарникари од Кавадарци и Неготино, пет доброволци од Доброволното противпожарно друштво од Неготино ангажирани од Дирекцијата за заштита и спасување, како и четири огнени тима со специјализирани возила „пинцгауер“. Голема поддршка од воздух дадоа и три „ер трактори“ на ДЗС и хеликоптер на Министерството за внатрешни работи.
Благодарение на брзата и координирана интервенција, огнената стихија беше запрена пред да стигне до куќите во двете села. Воедно, спасени беа лозовите насади и овоштарниците во атарот на селата, кои беа сериозно загрозени од пожарот.
Огнот избувнал вчера околу 09:00 часот во близина на селото Долно Чичево, а поради силниот ветер и сувата вегетација брзо се проширил кон Горно Чичево и околните ридови, формирајќи огнена линија долга околу десет километри.
Директорот на Дирекцијата за заштита и спасување, Стојанче Ангелов, кој беше на терен, јавно му оддаде признание на командирот на ТППЕ Велес, Димче Јованов, оценувајќи го како вистински херој за начинот на кој ја координирал акцијата.
Командирот Јованов информираше дека станувало збор за исклучително тежок и непристапен терен, но благодарение на заедничката акција на сите ангажирани служби пожарот бил целосно изгаснат околу 22:20 часот, кога било догасено и последното жариште.
Тој најави дека и денеска екипа на ТППЕ Велес повторно ќе излезе на терен за да изврши дополнителна контрола и да се увери дека нема опасност од повторно активирање на пожарот.
