Голем пожар попладнево избувна на депонијата „Мелци“ кај Кавадарци, каде што во тек е обемна интервенција на Територијалната противпожарна единица од Кавадарци.
Информацијата ја соопшти градоначалникот Митко Јанчев, кој наведе дека според првичните информации од терен, постојат индиции дека пожарот е предизвикан од човечки фактор.
„Според првичните информации од терен, постојат индиции дека пожарот е предизвикан од човечки фактор. Надлежните служби ќе ги утврдуваат околностите за неговото настанување“, објави Јанчев.
На терен се ангажирани голем број пожарникари кои работат на локализирање на огнената стихија и спречување на нејзиното понатамошно ширење.
Од Општина Кавадарци информираат дека внимателно ја следат состојбата и дека противпожарните екипи ќе останат ангажирани сè до целосно ставање на пожарот под контрола.
Воедно, градоначалникот упати апел до граѓаните да не се приближуваат до местото на пожарот и да ги почитуваат упатствата на надлежните служби, со цел да не се загрози нивната безбедност.
