По седум дена непрекината борба и огромни напори на сите екипи ангажирани на терен, пожарот во Мариово е целосно изгаснат, информира градоначалникот на Општина Прилеп, Дејан Проданоски.
Проданоски упати благодарност до сите институции, пожарникари, војници, полицајци, доброволци, мештани и граѓани кои во изминатите денови беа директно вклучени во справувањето со огнената стихија.
„Ова беше тешка и долга битка, во која на терен беа ангажирани голем број екипи, припадници на институциите, доброволци, мештани и поединци кои несебично помогнаа во справувањето со пожарот“, истакна Проданоски.
Тој посебно им се заблагодари на Територијалната противпожарна единица од Прилеп, Дирекцијата за заштита и спасување, Центарот за управување со кризи, Армијата, ЈП „Национални шуми“, МВР, ТППЕ Скопје и ТППЕ Кавадарци, како и на градоначалниците Орце Ѓорѓиевски и Митко Јанчев.
Благодарност упати и до доброволните противпожарни друштва од Битола, Кочани, Кавадарци и Виница, Универзалниот тим од Општинскиот штаб за заштита и спасување од Прилеп, како и до жителите на Чаниште, Крушевица, Мажучиште, Мало Коњари и Големо Коњари.
Во гаснењето на пожарот помогнале и повеќе општествено одговорни компании и индивидуални земјоделци со сопствена механизација.
Проданоски информираше дека и пожарот што вчера се појавил на потегот од Мажучиште, преку Мало и Големо Коњари до Широк пат – Варош, бил локализиран за кратко време благодарение на брзата реакција на екипите на терен.
„Во моментов, изгаснат е и последниот крак на пожарот кај с. Бонче и состојбата е целосно под контрола“, соопшти градоначалникот.
Тој упати и апел до граѓаните за максимална внимателност и одговорност, предупредувајќи дека една искра или едно невнимание може за кратко време да предизвика пожар со сериозни последици.
„Покажавме дека кога сме обединети, солидарни и посветени, можеме да се справиме и со најтешките предизвици. Благодарност и длабока почит до сите што беа дел од оваа голема борба“, порача Проданоски.
