Голем шумски пожар избувна денеска во близина на делчевското село Бигла, откако жител палел гуми во својот двор, но изгубил контрола врз огнот, кој се проширил кон блиската борова шума. Информацијата ја соопшти директорот на Дирекцијата за заштита и спасување, Стојанче Ангелов.
Според Ангелов, веднаш по пријавата биле ангажирани сите расположливи противпожарни сили од Делчево, а била побарана помош и од противпожарните единици од соседните општини.
На терен се испратени и трите противпожарни авиони „ертрактор“ на Дирекцијата за заштита и спасување, како и хеликоптер на Министерството за внатрешни работи.
„Неодговорно лице палело гуми во својот двор во селото Бигла. Притоа ја изгубило контролата врз огнот, кој се проширил во блиската борова шума. Во моментов има голем шумски пожар, а се преземаат сите мерки за негово локализирање“, изјави Ангелов.
Општина Делчево, како што информираше, ангажирала и тешка механизација, трактори и булдожери за изработка на противпожарни пресеци со цел да се спречи ширењето на пожарот кон куќите во селото.
Во обидите да го локализираат пожарот, лицето кое го предизвикало огнот, еден пожарникар и припадник на општинските служби вдишале поголема количина чад. Тие превентивно биле пренесени на лекарски преглед.
Ангелов најави дека лично се упатува кон местото на пожарот и дека дополнителни информации ќе бидат соопштени во текот на денот.
