Земјотрес со магнитуда од 5,9 степени рано утрово го погоди источниот дел на Јапонија, а силно се почувствува и во Токио. Најмалку 37 лица се повредени, главно полесно, додека властите соопштија дека нема опасност од цунами.
Според Јапонската метеоролошка агенција, епицентарот бил во јужниот дел на префектурата Ибараки, на длабочина од околу 70 километри. Американскиот геолошки институт (USGS) ја процени магнитудата на 5,8 степени.
Најмногу повредени има во Токио – 15 лица, девет во Саитама, осум во Канагава, четири во Чиба и едно лице во Ибараки. Повеќето од нив паднале од кревет или се удриле во мебел и врати, бидејќи земјотресот ги разбудил додека спиеле.
Во Јокохама, жена во осумдесеттите години паднала од кревет и се здобила со тешка повреда на колкот.
Потресот предизвикал доцнења во железничкиот сообраќај во регионот на Токио, додека шинкансен возовите продолжиле да сообраќаат без прекин.
Во токиската населба Кото пукнала подземна водоводна цевка, по што вода се излеала на улицата. Дефектот подоцна бил саниран.
Јапонската влада формираше кризен штаб за проценка на последиците, а метеоролошката агенција ги предупреди граѓаните да бидат внимателни поради можноста од нов умерен земјотрес во текот на следната недела.
Надлежните соопштија дека нема пријавени проблеми во нуклеарните централи и другите постројки со нуклеарни материјали.
