Тридневните интензивни трговски преговори меѓу САД и Канада завршија без договор. Американската администрација најави воведување царини од 50 отсто за одредени канадски производи, чија вредност се проценува на околу 20 милијарди долари.
Новите давачки треба да стапат во сила веднаш по полноќ во сабота по локално време. Од администрацијата на Доналд Трамп велат дека Отава барала поголеми царински олеснувања од оние што Вашингтон бил подготвен да ги понуди.
Канадскиот премиер Марк Карни, пак, соопшти дека ги прекинува преговорите и дека неговата земја ќе одговори со реципрочни мерки. Тој најави дека Канада ќе возврати „долар за долар“ на новите американски царини. Карни го обвини Вашингтон дека во последен момент ги променил условите и оцени дека новите барања биле неправедни и економски неоправдани.
Неуспехот да се постигне компромис сега се заканува дополнително да ги заостри трговските односи меѓу двете соседни земји.
