Дваесетгодишниот Јован Костадинов од Виница е добитник на престижната светска награда „Младинска храброст 2026“, која му е доделена за неговиот херојски подвиг при трагичниот пожар во кабарето „Пулс“ во Кочани во март 2025 година, кога, ризикувајќи го сопствениот живот, спаси 21 лице.
Признанието го доделува Академијата „Раул Валенберг“ во соработка со Шведскиот институт и шведските амбасади, а е наменето за млади од 13 до 20 години кои преку храброст, морални вредности и лична иницијатива придонесуваат за позитивни промени во општеството.
За овогодишното издание биле доставени номинации од 15 земји, меѓу кои Австралија, Канада, САД, Норвешка, Шведска, Полска, Србија и Црна Гора, а Костадинов е еден од вкупно 16 добитници.
Наградата е востановена во 2015 година во чест на хуманитарецот Раул Валенберг, со цел да ги истакне младите како двигатели на хуманоста, солидарноста и општествените промени.
Генералната секретарка на Академијата „Раул Валенберг“, Ана Уромби, истакна дека во време кога улогата на младите често се потценува, особено е важно да се препознаат оние кои со своите дела прават вистинска разлика.
„Овогодишните добитници покажуваат како младите можат да ги претворат вредностите во конкретни дела и да придонесат за подобар живот на другите, во духот на Раул Валенберг“, изјави Уромби.
Генералната директорка на Шведскиот институт, Мадлен Шестед, оцени дека големиот број држави вклучени во наградата е доказ дека младите ширум светот се силен двигател на човековите права и демократските вредности.
Сите 16 добитници ќе престојуваат во Шведска од 25 до 28 август. Свеченото доделување на наградите ќе се одржи на 27 август во Стокхолм, по повод Денот на Раул Валенберг, а младите ќе учествуваат и во специјалната едукативна програма „По стапките на Раул“, при што ќе се сретнат и со шведската министерка за надворешни работи, Марија Малмер Стенергард.
