Со повеќе свечени активности во Скопје и Штип денеска ќе бидат одбележани 34 години од формирањето на Армијата на Република Северна Македонија.
По повод 18 Август – Денот на Армијата, во касарната „Илинден“ во Скопје, вечерва во 19 часот, припадници на артилерискиот баталјон ќе извршат почесна артилериска стрелба со 10 плотуни од шест артилериски орудија. Пред свечената церемонија, во 18 часот ќе биде реализирана пробна артилериска стрелба со еден плотун.
Годишнината ќе биде одбележана и во касарната „Јане Сандански“ во Штип, каде ќе биде извршена смотра на 2. пешадиски баталјон и други армиски единици.
На свеченоста се очекува да присуствуваат претставници од повисоката команда на Армијата, градоначалници од зоната на одговорност на 2. пешадиски баталјон, директори и раководители на јавни претпријатија и институции во Штип, како и претставници на верските заедници.
Денот на Армијата се одбележува на 18 август, датумот кога во 1943 година на Славеј Планина бил формиран баталјонот „Мирче Ацев“, кој се смета за првата организирана воена формација на Народноослободителната војска на Македонија.
Формирањето на современата македонска Армија започна во 1992 година, по договорот за дислокација на Југословенската народна армија од територијата на тогашната Република Македонија, кој го потпиша тогашниот претседател Киро Глигоров.
Денес македонската Армија е дел од најголемиот колективен безбедносен систем во светот, откако Северна Македонија во март 2020 година стана 30-та полноправна членка на НАТО.
