Одделението за оперативни работи, во координација со Министерството за внатрешни работи, изврши засилена контрола на 38 пловни објекти на Охридското Езеро.
При контролите биле проверувани царинскиот статус на пловилата, како и лицата кои управуваат со нив, согласно одредбите од Царинскиот закон, Законот за внатрешна пловидба и останатата регулатива што го регулира увозот, прометот и користењето на пловните објекти.
Од Царинарница Битола информираат дека во изминатиот период е забележано зголемување на бројот на платени увозни давачки за пловила кои претходно биле внесени со привремен увоз.
„Тоа укажува дека контролите даваат ефект и дека сопствениците ги регулираат своите обврски согласно законските прописи“, изјави управникот на Царинарница Битола, Ѓоко Трпоски.
Целта на акциите е да се утврди дали пловните објекти кои се внесени во државата имаат соодветен царински статус. Посебен фокус е ставен на пловилата внесени со привремен увоз, кои можат да се користат во земјава само во законски определен рок.
По истекот на рокот, доколку пловилото не биде повторно извезено и напушти територијата на државата, сопствениците се должни да го регулираат неговиот статус и да извршат увозно царинење.
Началникот на Одделението за оперативни работи, Душан Размовски, посочи дека мобилните тимови ќе продолжат со засилени контроли.
Од Царината предупредуваат дека секое непочитување на законските одредби ќе биде соодветно санкционирано, а во одредени случаи мерките може да вклучуваат и одземање на пловниот објект.
