Состојбата со големиот шумски пожар на Халкидики вечерва е значително подобрена, соопшти директорот за стратешко планирање и комуникации во Противпожарната служба на Грција, Василис Ватракојанис. Иако пожарот сè уште не е целосно изгаснат, огнената линија е ставена под контрола, а гаснењето ќе продолжи и во текот на ноќта.
Пожарот, кој избувна околу 14 часот во близина на Сивири, зафати шумски површини, домови и возила. Во интервенцијата полесно се повредени двајца пожарникари.
Во акцијата за гаснење се ангажирани 227 пожарникари, 13 пешадиски тимови и 57 противпожарни возила. Помош пристигна и од Молдавија, чии 12 пожарникари со три возила учествуваат во интервенцијата преку европскиот механизам за цивилна заштита. До зајдисонце пожарот се гаснеше и од воздух со девет авиони и седум хеликоптери.
Поради опасноста, по морски пат беа евакуирани вкупно 481 лице, меѓу кои туристи и жители. Од плажата во Сивири, 285 лица беа пренесени во марината во Сани, додека уште 196 лица со траект беа транспортирани до Солун.
Сивири останува целосно евакуирано, а властите засега не дозволуваат враќање на жителите и туристите. Во прекин е и сообраќајот во поширокиот регион.
Во текот на денот грчките власти испратија четири предупредувања преку системот 112, од кои три беа наредби за евакуација на Сивири и Фурка.
Министерството за климатска криза и цивилна заштита на Грција активираше и специјална платформа за привремено сместување на лицата погодени од пожарот.
Од Министерството за надворешни работи и надворешна трговија на Македонија соопштија дека преку Конзулатот во Солун ја следат состојбата и апелираат македонските државјани кои се наоѓаат во погодените подрачја строго да ги почитуваат упатствата на грчките власти.
