Министерството за внатрешни работи информира дека досега 13 лица биле повикани на информативен разговор во рамки на истрагата за ширењето лажни информации на социјалните мрежи за наводно загадување на водата за пиење во Скопје.
Од МВР посочуваат дека Секторот за компјутерски криминал и дигитална форензика спровел службени разговори со лицата, при што сите изјавиле дека информациите ги објавиле или споделиле откако претходно виделе слична објава на социјалните мрежи или ги слушнале од друго лице.
Според МВР, ниту едно од повиканите лица не посочило конкретен, потврден или веродостоен извор со кој би можеле да се поткрепат тврдењата за загадување на водата.
Истрагата продолжува, а надлежните служби работат на утврдување кој прв ја пласирал дезинформацијата, како и на кој начин таа понатаму се ширела на интернет.
„Секторот за компјутерски криминал и дигитална форензика ќе продолжи со прибирање и анализа на податоци со цел да се потврдат сите околности поврзани со настанот, како и начинот на кој информациите се појавиле и понатаму се ширеле во интернет просторот“, соопшти МВР.
Од Министерството апелираат до граѓаните да не споделуваат непроверени информации и да се информираат исклучиво преку официјални и релевантни извори.
